*ਦਿੱਲੀ ਤੋਂ ਨਕਾਰੇ ਹੋਏ ਨੇਤਾ ਪੰਜਾਬ ‘ਤੇ ਬੋਝ, ਜਦਕਿ ਅਸਲੀ ਸਪੂਤ ਕਰ ਰਹੇ ਹਨ ਰਾਜ ਦਾ ਨਿਰਮਾਣ*



ਲੁਧਿਆਣਾ 28 ਅਪ੍ਰੈਲ (ਇੰਦਰਜੀਤ) : ਭਾਰਤੀ ਜਨਤਾ ਪਾਰਟੀ ਦੇ ਸਾਬਕਾ ਪ੍ਰਦੇਸ਼ ਪ੍ਰਧਾਨ ਅਤੇ ਸਾਬਕਾ ਮੰਤਰੀ ਮਨੋਰੰਜਨ ਕਾਲੀਆ ਨੇ ਲੁਧਿਆਣਾ ਦੇ ਭਾਜਪਾ ਜ਼ਿਲ੍ਹਾ ਦਫ਼ਤਰ ਵਿੱਚ ਇੱਕ ਪ੍ਰੈਸ ਕਾਨਫਰੰਸ ਕੀਤੀ, ਜਿਸ ਵਿੱਚ ਉਨ੍ਹਾਂ ਨੇ ਆਮ ਆਦਮੀ ਪਾਰਟੀ (ਆਪ) ‘ਤੇ ਤਿੱਖਾ ਹਮਲਾ ਕਰਦੇ ਹੋਏ ਉਨ੍ਹਾਂ ਕਿਹਾ ਕਿ ‘ਆਪ’ ਦੇ ਕੁਝ ਨੇਤਾ ਲੋਕਾਂ ਦੇ ਭਰੋਸੇ ਨਾਲ ਖੇਡ ਰਹੇ ਹਨ ਅਤੇ ਆਪਣੇ ਰਾਜਨੀਤਿਕ ਸਵਾਰਥ ਲਈ ਸਿਧਾਂਤਾਂ ਨਾਲ ਸਮਝੌਤਾ ਕਰ ਰਹੇ ਹਨ।
ਮਨੋਰੰਜਨ ਕਾਲੀਆ ਨੇ ਕਿਹਾ ਕਿ ਦੋਸ਼-ਪ੍ਰਤਿਦੋਸ਼ ਦਾ ਖੇਡ ਖੇਡਣ ਦੀ ਬਜਾਏ, ਅਰਵਿੰਦ ਕੇਜਰੀਵਾਲ ਨੂੰ ਇਸ ਗੱਲ ‘ਤੇ ਆਤਮ-ਚਿੰਤਨ ਕਰਨਾ ਚਾਹੀਦਾ ਹੈ ਕਿ ਉਨ੍ਹਾਂ ਦੀ ਪਾਰਟੀ ਦੇ 7 ਰਾਜ ਸਭਾ ਮੈਂਬਰਾਂ ਨੇ ਆਮ ਆਦਮੀ ਪਾਰਟੀ ਦਾ ਸਾਥ ਕਿਉਂ ਛੱਡ ਦਿੱਤਾ। ਪਾਰਟੀ ਦੀ ਸਥਾਪਨਾ ਤੋਂ ਲੈ ਕੇ ਹੁਣ ਤੱਕ 22 ਤੋਂ ਵੱਧ ਵੱਡੇ ਨੇਤਾ ਪਾਰਟੀ ਛੱਡ ਚੁੱਕੇ ਹਨ — ਜਿਨ੍ਹਾਂ ਵਿੱਚ ਯੋਗੇਂਦਰ ਯਾਦਵ, ਪ੍ਰਸ਼ਾਂਤ ਭੂਸ਼ਣ, ਕੁਮਾਰ ਵਿਸ਼ਵਾਸ, ਮੇਧਾ ਪਾਟਕਰ, ਕਪਿਲ ਮਿਸ਼ਰਾ, ਅਲਕਾ ਲਾਂਬਾ, ਡਾ.ਧਰਮਵੀਰ ਗਾਂਧੀ, ਸੁੱਚਾ ਸਿੰਘ ਛੋਟੇਪੁਰ, ਐਚ.ਐਸ. ਫੁਲਕਾ ਅਤੇ ਗੁਰਪ੍ਰੀਤ ਸਿੰਘ ਘੁੱਗੀ ਸ਼ਾਮਲ ਹਨ।
ਸਾਨੂੰ ਇਹ ਨਹੀਂ ਭੁੱਲਣਾ ਚਾਹੀਦਾ ਕਿ ਆਮ ਆਦਮੀ ਪਾਰਟੀ ਦਾ ਜਨਮ ਅੰਨਾ ਹਜ਼ਾਰੇ ਦੇ "ਇੰਡੀਆ ਅਗੇਂਸਟ ਕਰਪਸ਼ਨ" ਅੰਦੋਲਨ ਤੋਂ ਹੋਇਆ ਸੀ। ਕੇਜਰੀਵਾਲ ਨੇ ਉਸ ਅੰਦੋਲਨ ਨੂੰ ਹਾਈਜੈਕ ਕਰ ਲਿਆ, ਅੰਨਾ ਹਜ਼ਾਰੇ ਨੂੰ ਪਾਸੇ ਕਰ ਦਿੱਤਾ ਅਤੇ ਖੁਦ ਸੱਤਾ ‘ਤੇ ਕਾਬਿਜ ਹੋ ਗਏ।
ਇੱਥੋਂ ਤੱਕ ਕਿ ਕੇਜਰੀਵਾਲ ਦੇ ਸਭ ਤੋਂ ਭਰੋਸੇਮੰਦ ਸਿਪਾਹਸਾਲਾਰ — ਸੰਦੀਪ ਪਾਠਕ ਅਤੇ ਰਾਘਵ ਚੱਢਾ — ਜੋ ਦਿੱਲੀ ਅਤੇ ਪੰਜਾਬ ਵਿੱਚ ‘ਆਪ’ ਦੀਆਂ ਸਰਕਾਰਾਂ ਦੇ ਸ਼ਿਲਪਕਾਰ ਮੰਨੇ ਜਾਂਦੇ ਹਨ, ਉਹ ਵੀ ਖੁਦ ਨੂੰ ਬੈਕਫੁੱਟ ‘ਤੇ ਦਿਖਾ ਰਹੇ ਹਨ। ਕੇਜਰੀਵਾਲ ਨੂੰ ਆਪਣੀ ਅੰਤਰਆਤਮਾ ਵਿੱਚ ਝਾਤ ਮਾਰਨੀ ਚਾਹੀਦੀ ਹੈ ਅਤੇ ਪੁੱਛਣਾ ਚਾਹੀਦਾ ਹੈ — ਉਨ੍ਹਾਂ ਦੇ ਸਭ ਤੋਂ ਕਰੀਬੀ ਸਾਥੀ ਉਨ੍ਹਾਂ ਨੂੰ ਕਿਉਂ ਛੱਡ ਰਹੇ ਹਨ?
2024 ਦੇ ਨਗਰ ਨਿਗਮ ਚੋਣਾਂ ਨੇ ‘ਆਪ’ ਦੀ ਅਸਲ ਸੱਚਾਈ ਸਾਹਮਣੇ ਲਿਆ ਦਿੱਤੀ। ਅੰਮ੍ਰਿਤਸਰ, ਜਲੰਧਰ ਅਤੇ ਲੁਧਿਆਣਾ ਵਿੱਚ ‘ਆਪ’ ਬਹੁਮਤ ਹਾਸਲ ਕਰਨ ਵਿੱਚ ਅਸਫਲ ਰਹੀ। ਇਹ ਪੰਜਾਬ ਵਿੱਚ ਉਨ੍ਹਾਂ ਦੇ ਕੁਸ਼ਾਸਨ ‘ਤੇ ਲੋਕਾਂ ਦਾ ਫੈਸਲਾ ਸੀ। ਹਾਰ ਮੰਨਣ ਦੀ ਬਜਾਏ, ‘ਆਪ’ ਨੇ ਬਹੁਮਤ ਬਣਾਉਣ ਲਈ ਕਾਂਗਰਸ, ਭਾਜਪਾ ਅਤੇ ਅਕਾਲੀ ਦਲ ਦੇ ਕੌਂਸਲਰਾਂ ਨੂੰ ਲਾਲਚ ਦੇਣ ਅਤੇ ਦਲ-ਬਦਲ ਕਰਵਾਉਣ ਲਈ ਪੈਸੇ ਅਤੇ ਬਲ ਦਾ ਇਸਤੇਮਾਲ ਕੀਤਾ।
ਉਨ੍ਹਾਂ ਕਿਹਾ ਕਿ ਕੀ ਇਹ ਸਿਧਾਂਤਾਂ ਦੀ ਰਾਜਨੀਤੀ ਹੈ? ਦਿੱਲੀ ਦੇ ਸਾਬਕਾ ਉਪ ਮੁੱਖ ਮੰਤਰੀ ਮਨੀਸ਼ ਸਿਸੋਦੀਆ ਨੇ ਖੁਦ ਪੰਜਾਬ ਵਿੱਚ ‘ਆਪ’ ਵਰਕਰਾਂ ਨੂੰ ਕਿਹਾ ਸੀ ਕਿ ਸੱਤਾ ਹਾਸਲ ਕਰਨ ਅਤੇ ਉਸਨੂੰ ਕਾਇਮ ਰੱਖਣ ਲਈ "ਸਾਮ, ਦਾਮ, ਦੰਡ, ਭੇਦ" — ਇੱਥੋਂ ਤੱਕ ਕਿ ਲੜਾਈ-ਝਗੜੇ ਦਾ ਵੀ ਇਸਤੇਮਾਲ ਕਰੋ। ਹੁਣ ਇਨ੍ਹਾਂ ਦਾ ਨਕਾਬ ਉਤਰ ਚੁੱਕਾ ਹੈ।
ਇਸ ਮੌਕੇ ‘ਤੇ ਭਾਜਪਾ ਜ਼ਿਲ੍ਹਾ ਪ੍ਰਧਾਨ ਰਜਨੀਸ਼ ਧੀਮਾਨ, ਪ੍ਰਦੇਸ਼ ਸਕੱਤਰ ਰੇਣੁ ਠਾਪਰ, ਸੀਨੀਅਰ ਨੇਤਾ ਅਰੁਣੇਸ਼ ਮਿਸ਼ਰਾ, ਜ਼ਿਲ੍ਹਾ ਮਹਾਮੰਤਰੀ ਸਰਦਾਰ ਨਰਿੰਦਰ ਸਿੰਘ ਮੱਲੀ, ਡਾ.ਕਨਿਕਾ ਜਿੰਦਲ, ਯਸ਼ਪਾਲ ਜਨੋਤਰਾ,ਮਿਤ ਪ੍ਰਧਾਨ ਡਾ. ਨਿਰਮਲ ਨੱਯਰ, ਨਵਲ ਜੈਨ, ਪ੍ਰੈਸ ਸਕੱਤਰ ਡਾ. ਸਤੀਸ਼ ਕੁਮਾਰ,ਸੋਸ਼ਲ ਮੀਡਿਆ ਸਚਿਵ ਰਾਜਨ ਪਾਂਧੇ ਮੌਜੂਦ ਸਨ।