ਤਨਖਾਹ ਦੀਆਂ ਸ਼ਰਤਾਂ ਕੀਤੀਆਂ ਸੌਖੀਆਂ-ਨਿਯਮਾਂ ’ਤੇ ਵੱਜੀ ਆਖਰੀ ਘੁੱਗੀ
-ਵਿਦੇਸ਼ੀ ਪੜ੍ਹਾਈ ਦੇ ਨਿਯਮਾਂ ਵਿੱਚ ਢਿੱਲ, ਪਰ ਸਵੈ-ਰੁਜ਼ਗਾਰ ’ਤੇ ਲੱਗੀ ਪੂਰੀ ਰੋਕ
-
ਔਕਲੈਂਡ, 18 ਜੂਨ, 2026:-"ਨਿਊਜ਼ੀਲੈਂਡ ਸਰਕਾਰ ਨੇ ਪ੍ਰਵਾਸੀਆਂ ਨੂੰ ਪੱਕੇ ਨਿਵਾਸੀ ਬਣਾਉਣ ਵਾਲੇ ਮੁੱਖ ਵੀਜ਼ਾ ਨਿਯਮਾਂ ਵਿੱਚ ਵੱਡੀਆਂ ਤਬਦੀਲੀਆਂ ਦਾ ਅੰਤਿਮ ਐਲਾਨ ਕਰ ਦਿੱਤਾ ਹੈ। ਆਉਂਦੀ 24 ਅਗਸਤ ਤੋਂ ਲਾਗੂ ਹੋਣ ਜਾ ਰਹੇ ਇਨ੍ਹਾਂ ਨਵੇਂ ਨਿਯਮਾਂ ਤਹਿਤ ਜਿੱਥੇ ਤਨਖਾਹਾਂ ਦੀਆਂ ਸ਼ਰਤਾਂ ਨੂੰ ਬਹੁਤ ਸੌਖਾ ਅਤੇ ਸਪਸ਼ਟ ਕਰ ਦਿੱਤਾ ਗਿਆ ਹੈ, ਉੱਥੇ ਹੀ ਪੱਕੇ ਹੋਣ ਲਈ ਦੋ ਨਵੇਂ ਸਿੱਧੇ ਰਸਤੇ ਵੀ ਖੋਲ੍ਹੇ ਗਏ ਹਨ। ਪਰ ਦੂਜੇ ਪਾਸੇ, ਆਪਣੇ ਕਾਰੋਬਾਰ (ਸਵੈ-ਰੁਜ਼ਗਾਰ) ਦੇ ਤਜ਼ਰਬੇ ’ਤੇ ਨਵੇਂ ਰਸਤਿਆਂ ਰਾਹੀਂ ਪੱਕੇ ਹੋਣ ’ਤੇ ਪੂਰੀ ਤਰ੍ਹਾਂ ਰੋਕ ਲਗਾ ਦਿੱਤੀ ਗਈ ਹੈ। ਇਸ ਫੈਸਲੇ ਨਾਲ ਪੱਕੇ ਹੋਣ ਦੀ ਉਡੀਕ ਕਰ ਰਹੇ ਹਜ਼ਾਰਾਂ ਪ੍ਰਵਾਸੀ ਕਾਮਿਆਂ ਨੂੰ ਵੱਡੀ ਰਾਹਤ ਮਿਲੇਗੀ, ਕਿਉਂਕਿ ਹੁਣ ਤਨਖਾਹਾਂ ਦੇ ਵਾਰ-ਵਾਰ ਬਦਲਣ ਵਾਲੇ ਨਿਯਮਾਂ ਨੂੰ ਸੌਖਾ ਕਰ ਦਿੱਤਾ ਗਿਆ ਹੈ।
ਇਸ ਫੈਸਲੇ ਨਾਲ ਜੁੜੀ ਹਰ ਇੱਕ ਬਾਰੀਕੀ ਨੂੰ ਹੇਠਾਂ ਵਿਸਥਾਰ ਨਾਲ ਸਮਝੋ।
ਕਮਾਈ ਦੀ ਦਰ ਦੇ ਬਾਰ-ਬਾਰ ਬਦਲਣ ਦੇ ਬਿਖੜੇ ਨਿਯਮਾਂ ਤੋਂ ਮਿਲੇਗੀ ਵੱਡੀ ਰਾਹਤ:
ਨਵੇਂ ਫੈਸਲੇ ਮੁਤਾਬਕ ਹੁਣ ਪ੍ਰਵਾਸੀਆਂ ਨੂੰ ਪੱਕੇ ਹੋਣ ਵੇਲੇ ਵਾਰ-ਵਾਰ ਵਧਦੀ ਹੋਈ ਤਨਖਾਹ ਦੀ ਸ਼ਰਤ ਪੂਰੀ ਨਹੀਂ ਕਰਨੀ ਪਵੇਗੀ। ਜਦੋਂ ਕੋਈ ਪ੍ਰਵਾਸੀ ਆਪਣਾ ਤਜ਼ਰਬਾ ਜੋੜਨਾ ਸ਼ੁਰੂ ਕਰੇਗਾ, ਉਸ ਸਮੇਂ ਜੋ ਤਨਖਾਹ ਦੀ ਦਰ ਤੈਅ ਹੋਵੇਗੀ, ਉਹੀ ਆਖ਼ਰ ਤੱਕ ਮੰਨੀ ਜਾਵੇਗੀ। ਭਾਵੇਂ ਰੈਜ਼ੀਡੈਂਸ ਵੀਜ਼ਾ ਫਾਈਲ ਕਰਨ ਵੇਲੇ ਦੇਸ਼ ਦੀ ਔਸਤ ਤਨਖਾਹ (ਮੀਡੀਅਨ ਵੇਜ) ਵਧ ਵੀ ਜਾਵੇ, ਤਾਂ ਵੀ ਬਿਨੈਕਾਰ ’ਤੇ ਪੁਰਾਣੀ ਦਰ ਹੀ ਲਾਗੂ ਰਹੇਗੀ।  
 ਵਰਕ ਟੂ ਰੈਜ਼ੀਡੈਂਸ ਵੀਜ਼ਿਆਂ ਲਈ ਉਜਰਤ ਦਰ (ਵੇਜ ਰੇਟ) ਦੇ ਨਿਯਮਾਂ ਵਿੱਚ 2026 ਦੇ ਬਦਲਾਅ
24 ਅਗਸਤ 2026 ਤੋਂ ਵਰਕ ਟੂ ਰੈਜ਼ੀਡੈਂਸ ਵੀਜ਼ਿਆਂ (work to residence visas) ਲਈ ਉਜਰਤ ਦਰਾਂ ਦੀ ਗਣਨਾ ਕਰਨ ਦੇ ਨਿਯਮਾਂ ਵਿੱਚ ਬਦਲਾਅ ਹੋ ਰਿਹਾ ਹੈ। ਇਸ ਵਿੱਚ ਟਾਇਰ 2 ਗ੍ਰੀਨ ਲਿਸਟ, ਕੇਅਰ ਵਰਕਫੋਰਸ, ਅਤੇ ਟਰਾਂਸਪੋਰਟ ਸੈਕਟਰ ਵਰਕ ਟੂ ਰੈਜ਼ੀਡੈਂਸ ਵੀਜ਼ੇ ਸ਼ਾਮਲ ਹਨ।
ਕੀ ਬਦਲਾਅ ਹੋ ਰਿਹਾ ਹੈ?
24 ਅਗਸਤ 2026 ਤੋਂ ਅਸੀਂ ਰੈਜ਼ੀਡੈਂਸ (ਪੱਕੀ ਰਿਹਾਇਸ਼) ਦੀਆਂ ਅਰਜ਼ੀਆਂ ਲਈ ਲੋੜੀਂਦੀ ਉਜਰਤ ਦਰ (ਵੇਜ ਰੇਟ) ਦੀ ਗਣਨਾ ਕਰਨ ਦੇ ਤਰੀਕੇ ਵਿੱਚ ਬਦਲਾਅ ਕਰ ਰਹੇ ਹਾਂ। ਲੋੜੀਂਦੀ ਉਜਰਤ ਦਰ ਉਹ ਘੱਟੋ-ਘੱਟ ਰਕਮ ਹੈ ਜੋ ਤੁਹਾਨੂੰ ਮਿਲਣੀ ਲਾਜ਼ਮੀ ਹੈ ਤਾਂ ਜੋ ਤੁਹਾਡੇ ਕੰਮ ਦੇ ਤਜਰਬੇ (ਵਰਕ ਐਕਸਪੀਰੀਅੰਸ) ਨੂੰ ਰੈਜ਼ੀਡੈਂਸ ਲਈ ਗਿਣਿਆ ਜਾ ਸਕੇ। ਜਦੋਂ ਤੁਸੀਂ ਰੈਜ਼ੀਡੈਂਸ ਲਈ ਅਪਲਾਈ ਕਰੋਗੇ, ਤਾਂ ਤੁਹਾਨੂੰ ਵਧੀ ਹੋਈ ਉਜਰਤ ਦਰ ਦੀ ਸ਼ਰਤ ਨੂੰ ਪੂਰਾ ਕਰਨ ਦੀ ਵੀ ਲੋੜ ਨਹੀਂ ਹੋਵੇਗੀ। ਇਹ ਬਦਲਾਅ ਇਹਨਾਂ ਵੀਜ਼ਿਆਂ ’ਤੇ ਲਾਗੂ ਹੁੰਦੇ ਹਨ:
-ਟਾਇਰ 2 ਗ੍ਰੀਨ ਲਿਸਟ ਵਰਕ ਟੂ ਰੈਜ਼ੀਡੈਂਸ ਵੀਜ਼ਾ (Tier-2 Green List Work to Residence Visa)
-ਟਰਾਂਸਪੋਰਟ ਵਰਕ ਟੂ ਰੈਜ਼ੀਡੈਂਸ ਵੀਜ਼ਾ (Transport Work to Residence Visa)
-ਕੇਅਰ ਵਰਕਫੋਰਸ ਵਰਕ ਟੂ ਰੈਜ਼ੀਡੈਂਸ ਵੀਜ਼ਾ (Care Workforce Work to Residence Visa)
ਗ੍ਰੇਸ ਪੀਰੀਅਡ (ਰਿਆਇਤੀ ਸਮਾਂ)
ਇਸ ਦੇ ਨਾਲ ਹੀ ਸਰਕਾਰ ਨੇ ਪੰਜ ਮਹੀਨਿਆਂ ਦਾ ਇੱਕ ਵਿਸ਼ੇਸ਼ ਰਿਆਇਤੀ ਸਮਾਂ (ਗ੍ਰੇਸ ਪੀਰੀਅਡ) ਵੀ ਦਿੱਤਾ ਹੈ। ਜੇਕਰ ਵੀਜ਼ਾ ਮਿਲਣ ਤੋਂ ਬਾਅਦ ਪਰ ਕੰਮ ਸ਼ੁਰੂ ਕਰਨ ਤੋਂ ਪਹਿਲਾਂ ਤਨਖਾਹ ਦੀ ਸਰਕਾਰੀ ਦਰ ਵਧ ਜਾਂਦੀ ਹੈ, ਤਾਂ ਵੀ ਵੀਜ਼ਾ ਮਿਲਣ ਵਾਲੇ ਦਿਨ ਵਾਲੀ ਤਨਖਾਹ ਨੂੰ ਹੀ ਮਾਨਤਾ ਦਿੱਤੀ ਜਾਵੇਗੀ, ਬਸ਼ਰਤੇ ਕਾਮੇ ਨੇ ਵੀਜ਼ਾ ਮਿਲਣ ਦੇ ਪੰਜ ਮਹੀਨਿਆਂ ਦੇ ਅੰਦਰ ਕੰਮ ਸ਼ੁਰੂ ਕਰ ਦਿੱਤਾ ਹੋਵੇ। ਜਦੋਂ ਤੁਹਾਡਾ ਵੀਜ਼ਾ ਮਨਜ਼ੂਰ ਹੋਇਆ ਸੀ, ਉਦੋਂ ਤੁਹਾਨੂੰ ਤੁਹਾਡੀ ਨੌਕਰੀ ਲਈ ਲੋੜੀਂਦੀ ਉਜਰਤ ਦਰ (ਵੇਜ ਰੇਟ) ਦਿੱਤੀ ਜਾ ਰਹੀ ਸੀ, ਅਤੇ ਤੁਸੀਂ ਯੋਗ ਕੰਮ ਦੇ ਤਜਰਬੇ ਦੀ ਗਿਣਤੀ ਕਰਨ ਲਈ 30-ਮਹੀਨਿਆਂ ਦੀ ਸਮਾਂ-ਸੀਮਾ ਵਿੱਚ ਆਪਣਾ ਕੰਮ ਦਾ ਤਜਰਬਾ ਜਾਰੀ ਰੱਖਦੇ ਹੋ। 24 ਅਗਸਤ 2026 ਤੋਂ, ਇੱਕ ਨਵਾਂ ਗ੍ਰੇਸ ਪੀਰੀਅਡ (ਰਿਆਇਤੀ ਸਮਾਂ) ਨਿਯਮ ਲਾਗੂ ਹੋਵੇਗਾ। ਇਹ ਉਨ੍ਹਾਂ ਸਥਿਤੀਆਂ ਲਈ ਹੈ ਜਿੱਥੇ ਤੁਹਾਡੇ ਵਰਕ ਵੀਜ਼ਾ ਮਿਲਣ ਅਤੇ ਤੁਹਾਡੇ ਕੰਮ ਦਾ ਤਜਰਬਾ (ਵਰਕ ਐਕਸਪੀਰੀਅੰਸ) ਸ਼ੁਰੂ ਕਰਨ ਦੇ ਵਿਚਕਾਰਲੇ ਸਮੇਂ ਦੌਰਾਨ ਤੁਹਾਡੀ ਨੌਕਰੀ ਲਈ ਲੋੜੀਂਦੀ ਉਜਰਤ ਦਰ (ਵੇਜ ਰੇਟ) ਵਧ ਜਾਂਦੀ ਹੈ।
ਪੱਕੇ ਹੋਣ ਲਈ ਖੁੱਲ੍ਹਣਗੇ ਦੋ ਨਵੇਂ ਸਿੱਧੇ ਰਸਤੇ
ਸਰਕਾਰ 24 ਅਗਸਤ ਤੋਂ ਦੋ ਨਵੇਂ ਰਾਹ ਸ਼ੁਰੂ ਕਰਨ ਜਾ ਰਹੀ ਹੈ, ਜਿਸ ਨਾਲ 6 ਪੁਆਇੰਟਾਂ ਤੋਂ ਬਿਨਾਂ ਵੀ ਪੱਕੇ ਹੋਇਆ ਜਾ ਸਕੇਗਾ:
- ਹੱਥੀਂ ਹੁਨਰ ਅਤੇ ਤਕਨੀਕੀ ਕਾਮਿਆਂ ਦਾ ਰਾਹ (ਟਰੇਡਜ਼ ਐਂਡ ਟੈਕਨੀਸ਼ੀਅਨ ਪਾਥਵੇਅ): ਇਹ ਉਹਨਾਂ ਕਾਮਿਆਂ ਲਈ ਹੈ ਜੋ ਕਿਸੇ ਖ਼ਾਸ ਹੁਨਰ ਜਾਂ ਤਕਨੀਕੀ ਖੇਤਰ ਵਿੱਚ ਕੰਮ ਕਰਦੇ ਹਨ।
-ਮਾਹਰ ਕੰਮ ਦੇ ਤਜ਼ਰਬੇ ਦਾ ਰਾਹ (ਸਕਿਲਡ ਵਰਕ ਐਕਸਪੀਰੀਅੰਸ ਪਾਥਵੇਅ): ਜੇਕਰ ਤੁਹਾਡੇ ਕੋਲ ਲੰਮਾ ਅਤੇ ਮਜ਼ਬੂਤ ਕੰਮ ਦਾ ਤਜ਼ਰਬਾ ਹੈ, ਤਾਂ ਤੁਸੀਂ ਸਿਰਫ਼ ਤਜ਼ਰਬੇ ਦੇ ਸਿਰ ’ਤੇ ਹੀ ਪੱਕੇ ਹੋ ਸਕਦੇ ਹੋ। ਇਸ ਲਈ ਪਹਿਲੇ ਤੋਂ ਤੀਜੇ ਪੱਧਰ ਦੇ ਕਿੱਤੇ ਵਿੱਚ ਪੰਜ ਸਾਲ ਦਾ ਤਜ਼ਰਬਾ ਚਾਹੀਦਾ ਹੈ, ਜਿਸ ਵਿੱਚੋਂ ਦੋ ਸਾਲ ਨਿਊਜ਼ੀਲੈਂਡ ਦੇ ਹੋਣੇ ਚਾਹੀਦੇ ਹਨ ਅਤੇ ਤਨਖਾਹ ਤੈਅ ਦਰ ਤੋਂ ਦਸ ਫ਼ੀਸਦੀ ਵੱਧ ਹੋਣੀ ਚਾਹੀਦੀ ਹੈ।

ਵਿਦੇਸ਼ੀ ਪੜ੍ਹਾਈ ਦੇ ਨਿਯਮਾਂ ਵਿੱਚ ਢਿੱਲ, ਪਰ ਸਵੈ-ਰੁਜ਼ਗਾਰ ’ਤੇ ਲੱਗੀ ਪੂਰੀ ਰੋਕ
ਹੁਣ ਵਿਦੇਸ਼ਾਂ ਤੋਂ ਹੱਥੀਂ ਹੁਨਰ ਜਾਂ ਤਕਨੀਕੀ ਪੜ੍ਹਾਈ ਕਰਨ ਵਾਲੇ ਪ੍ਰਵਾਸੀਆਂ ਲਈ ਇੱਕ 37 ਤੋਂ ਵੱਧ ਕ੍ਰੈਡਿਟ ਹੋਣ ਦੀ ਸ਼ਰਤ ਨੂੰ ਖ਼ਤਮ ਕਰ ਦਿੱਤਾ ਗਿਆ ਹੈ। ਪਰ ਜਿਹੜੇ ਪ੍ਰਵਾਸੀਆਂ ਨੇ ਨਿਊਜ਼ੀਲੈਂਡ ਤੋਂ ਪੜ੍ਹਾਈ ਕੀਤੀ ਹੈ, ਉਹਨਾਂ ਦੀ ਡਿਗਰੀ ਜਾਂ ਕੋਰਸ ਵਿੱਚ ਘੱਟੋ-ਘੱਟ ਇੱਕ ਸੌਂਤੀਂ ਕ੍ਰੈਡਿਟ ਹੋਣੇ ਲਾਜ਼ਮੀ ਹਨ, ਜਿਸ ਲਈ ਇੱਕ ਤੋਂ ਵੱਧ ਆਪਸ ਵਿੱਚ ਜੁੜੇ ਕੋਰਸਾਂ ਦੇ ਕ੍ਰੈਡਿਟ ਵੀ ਜੋੜੇ ਜਾ ਸਕਦੇ ਹਨ।
ਆਪਣਾ ਕਾਰੋਬਾਰ (ਸਵੈ-ਰੁਜ਼ਗਾਰ) ਕਰਨ ਵਾਲਿਆਂ ਨੂੰ ਵੱਡਾ ਝਟਕਾ:  
ਸਭ ਤੋਂ ਵੱਡਾ ਝਟਕਾ ਆਪਣੇ ਕਾਰੋਬਾਰ (ਸਵੈ-ਰੁਜ਼ਗਾਰ) ਕਰਨ ਵਾਲਿਆਂ ਨੂੰ ਲੱਗਾ ਹੈ। ਇਨ੍ਹਾਂ ਨਵੇਂ ਰਸਤਿਆਂ ਰਾਹੀਂ ਪੱਕੇ ਹੋਣ ਲਈ ਆਪਣੇ ਕਾਰੋਬਾਰ ਜਾਂ ਫਰੀਲਾਂਸਿੰਗ ਦੇ ਤਜ਼ਰਬੇ ਨੂੰ ਸਿੱਧੇ ਤੌਰ ’ਤੇ ਮਾਨਤਾ ਨਹੀਂ ਦਿੱਤੀ ਜਾਵੇਗੀ, ਕਿਉਂਕਿ ਇਮੀਗ੍ਰੇਸ਼ਨ ਵਿਭਾਗ ਮੁਤਾਬਕ ਅਜਿਹੇ ਤਜ਼ਰਬੇ ਦੀ ਪੜਤਾਲ ਕਰਨਾ ਔਖਾ ਹੁੰਦਾ ਹੈ।
ਡਿਗਰੀਆਂ ਦੇ ਨੰਬਰਾਂ ਵਿੱਚ ਵਾਧਾ ਅਤੇ ਪੜ੍ਹਾਈ ਦੇ ਸਬੂਤਾਂ ਲਈ ਸਖ਼ਤੀ
ਨਵੇਂ ਨਿਯਮਾਂ ਅਨੁਸਾਰ ਬੈਚਲਰ ਡਿਗਰੀ ਦੇ ਪੁਆਇੰਟ ਤਿੰਨ ਤੋਂ ਵਧਾ ਕੇ ਚਾਰ ਕਰ ਦਿੱਤੇ ਗਏ ਹਨ। ਪਰ ਹੁਣ ਅੱਠਵੇਂ ਜਾਂ ਨੌਵੇਂ ਪੱਧਰ ਦੀ ਉੱਚੀ ਪੜ੍ਹਾਈ ਦੇ ਨੰਬਰ ਦਾਅਵਾ ਕਰਨ ਵਾਲਿਆਂ ਨੂੰ ਆਪਣੀ ਬੈਚਲਰ ਡਿਗਰੀ ਦਾ ਸਰਟੀਫਿਕੇਟ ਅਤੇ ਪੜ੍ਹਾਈ ਦਾ ਪੂਰਾ ਰਿਕਾਰਡ (ਟਰਾਂਸਕ੍ਰਿਪਟ) ਵੀ ਨਾਲ ਦੇਣਾ ਪਵੇਗਾ। ਸਿਰਫ਼ ਨਿਊਜ਼ੀਲੈਂਡ ਤੋਂ ਮਾਸਟਰ ਡਿਗਰੀ ਕਰਕੇ ਪੰਜ ਪੁਆਇੰਟ ਲੈਣ ਵਾਲਿਆਂ ਨੂੰ ਬੈਚਲਰ ਡਿਗਰੀ ਦੇ ਸਬੂਤ ਦੇਣ ਤੋਂ ਛੋਟ ਰਹੇਗੀ।
ਸਿਰਫ਼ ਅਸਲੀ ਅਤੇ ਪੱਕੀ ਨੌਕਰੀ ਵਾਲਿਆਂ ਨੂੰ ਹੀ ਮਿਲੇਗੀ ਨਿਊਜ਼ੀਲੈਂਡ ਦੀ ਰੈਜ਼ੀਡੈਂਸੀ
ਇਮੀਗ੍ਰੇਸ਼ਨ ਵਿਭਾਗ ਨੇ ‘ਅਸਲੀ ਨੌਕਰੀ’ ਦੀ ਪਰਿਭਾਸ਼ਾ ਨੂੰ ਹੋਰ ਸਖ਼ਤ ਕਰ ਦਿੱਤਾ ਹੈ। ਹੁਣ ਨੌਕਰੀ ਦਾ ਆਫ਼ਰ ਲੈਟਰ ਸਿਰਫ਼ ਕਾਗਜ਼ੀ ਨਹੀਂ ਹੋਣਾ ਚਾਹੀਦਾ, ਬਲਕਿ ਨੌਕਰੀ ਲਗਾਤਾਰ ਚੱਲਣ ਵਾਲੀ ਹੋਣੀ ਚਾਹੀਦੀ ਹੈ ਅਤੇ ਮਾਲਕ ਨੂੰ ਇਹ ਸਾਬਤ ਕਰਨਾ ਪਵੇਗਾ ਕਿ ਇਸ ਕੰਮ ਲਈ ਕਾਮੇ ਦਾ ਨਿਊਜ਼ੀਲੈਂਡ ਵਿੱਚ ਰਹਿਣਾ ਸੱਚਮੁੱਚ ਜ਼ਰੂਰੀ ਹੈ। ਜੇਕਰ ਵਿਭਾਗ ਨੂੰ ਨੌਕਰੀ ਦੇ ਫ਼ਰਜ਼ੀ ਹੋਣ ਦਾ ਜ਼ਰਾ ਵੀ ਸ਼ੱਕ ਹੋਇਆ, ਤਾਂ ਵੀਜ਼ਾ ਸਿੱਧਾ ਰੱਦ ਕਰ ਦਿੱਤਾ ਜਾਵੇਗਾ।