*ਪੰਜਾਬ ਦੇ ਰਾਜਪਾਲ ਗੁਲਾਬ ਚੰਦ ਕਟਾਰੀਆ ਵੱਲੋਂ ਉਨ੍ਹਾਂ ਨੂੰ ਇੱਕ ਵਿਸ਼ੇਸ਼ ਸਮਾਰੋਹ ਦੌਰਾਨ ਸਨਮਾਨਿਤ ਕੀਤਾ ਗਿਆ।* 

 *ਸਿਮਰਨਦੀਪ ਦੀ ਇਹ ਸਫ਼ਲਤਾ ਚਾਰ ਸਾਲਾਂ ਦੇ ਅਣਥੱਕ ਸੰਘਰਸ਼, ਅਡੋਲ ਸਬਰ ਅਤੇ ਨਿਰੰਤਰ ਸਖ਼ਤ ਮਿਹਨਤ ਦਾ ਨਤੀਜਾ ਹੈ* 


ਪਟਿਆਲਾ/ਲੁਧਿਆਣਾ, 23 ਜੂਨ (ਮਨਜੀਤ ਸਿੰਘ ਧੀਮਾਨ) : ਪਟਿਆਲਾ ਜ਼ਿਲ੍ਹੇ ਦੇ ਇੱਕ ਛੋਟੇ ਜਿਹੇ ਪਿੰਡ ਬਿਰੜਵਾਲ ਦੀ ਰਹਿਣ ਵਾਲੀ ਅਤੇ ਕਿਸਾਨ ਪਰਿਵਾਰ ਦੀ ਧੀ ਸਿਮਰਨਦੀਪ ਕੌਰ ਨੇ ਦੇਸ਼ ਦੀ ਸਭ ਤੋਂ ਵੱਕਾਰੀ ਯੂਪੀਐਸਸੀ ਪ੍ਰੀਖਿਆ ਵਿੱਚੋਂ 15ਵਾਂ ਰੈਂਕ ਹਾਸਲ ਕਰਕੇ ਪੂਰੇ ਸੂਬੇ ਦਾ ਨਾਮ ਰੌਸ਼ਨ ਕੀਤਾ ਹੈ। ਉਸ ਦੀ ਇਸ ਬੇਮਿਸਾਲ ਪ੍ਰਾਪਤੀ ਲਈ ਬੀਤੇ ਦਿਨ 22 ਜੂਨ ਨੂੰ ਪੰਜਾਬ ਦੇ ਰਾਜਪਾਲ ਗੁਲਾਬ ਚੰਦ ਕਟਾਰੀਆ ਵੱਲੋਂ ਉਨ੍ਹਾਂ ਨੂੰ ਇੱਕ ਵਿਸ਼ੇਸ਼ ਸਮਾਰੋਹ ਦੌਰਾਨ ਸਨਮਾਨਿਤ ਕੀਤਾ ਗਿਆ।
 ਇਸ ਭਾਵੁਕ ਪਲ ਦੌਰਾਨ ਆਪਣੀ ਹੋਣਹਾਰ ਧੀ ਨੂੰ ਰਾਜਪਾਲ ਹੱਥੋਂ ਸਨਮਾਨ ਲੈਂਦੇ ਦੇਖ ਕੇ ਪਿਤਾ ਕੁਲਦੀਪ ਸਿੰਘ ਦੀਆਂ ਅੱਖਾਂ ਵਿੱਚੋਂ ਖ਼ੁਸ਼ੀ ਦੇ ਅੱਥਰੂ ਛਲਕ ਪਏ। ਸਿਮਰਨਦੀਪ ਦੀ ਇਹ ਸਫ਼ਲਤਾ ਚਾਰ ਸਾਲਾਂ ਦੇ ਅਣਥੱਕ ਸੰਘਰਸ਼, ਅਡੋਲ ਸਬਰ ਅਤੇ ਨਿਰੰਤਰ ਸਖ਼ਤ ਮਿਹਨਤ ਦਾ ਨਤੀਜਾ ਹੈ।ਆਪਣੀ ਸਫ਼ਲਤਾ ਦੇ ਸਫ਼ਰ ਬਾਰੇ ਦੱਸਦਿਆਂ ਸਿਮਰਨਦੀਪ ਨੇ ਸਾਂਝਾ ਕੀਤਾ ਕਿ ਇਹ ਉਸ ਦੀ ਚੌਥੀ ਕੋਸ਼ਿਸ਼ ਸੀ। ਇਸ ਤੋਂ ਪਹਿਲਾਂ ਤਿੰਨ ਵਾਰ ਉਹ ਪ੍ਰੀਲਿਮ ਪ੍ਰੀਖਿਆ ਤਾਂ ਪਾਸ ਕਰ ਲੈਂਦੀ ਸੀ, ਪਰ ਮੇਨਜ਼ (ਮੁੱਖ ਪ੍ਰੀਖਿਆ) ਵਿੱਚ ਅਸਫ਼ਲ ਰਹਿ ਜਾਂਦੀ ਸੀ। ਵਾਰ-ਵਾਰ ਮਿਲੀਆਂ ਅਸਫ਼ਲਤਾਵਾਂ ਤੋਂ ਹਾਰ ਮੰਨਣ ਦੀ ਬਜਾਏ ਉਸ ਨੇ ਇੱਕ ਨਵੀਂ ਰਣਨੀਤੀ ਅਪਣਾਈ ਅਤੇ ਪਿਛਲੇ ਸਾਲਾਂ ਦੇ ਟਾਪਰਾਂ ਦੀਆਂ ਉੱਤਰ-ਪੱਤਰੀਆਂ ਦੇ ਲਿਖਣ ਸ਼ੈਲੀ ਅਤੇ ਪੈਟਰਨ ਦਾ ਡੂੰਘਾਈ ਨਾਲ ਅਧਿਐਨ ਕੀਤਾ। ਟਾਪਰਾਂ ਦੇ ਲਿਖਣ ਦੇ ਤਰੀਕੇ ਨੂੰ ਸਮਝ ਕੇ ਉਸ ਨੇ ਆਪਣੀਆਂ ਕਮੀਆਂ ਨੂੰ ਦੂਰ ਕੀਤਾ, ਜਿਸ ਸਦਕਾ ਅੱਜ ਉਸ ਨੇ ਇਹ ਮੁਕਾਮ ਹਾਸਲ ਕੀਤਾ ਹੈ।
ਸਿਮਰਨਦੀਪ ਦੀ ਸਿਵਲ ਸੇਵਾਵਾਂ ਵਿੱਚ ਜਾਣ ਦੀ ਪ੍ਰੇਰਨਾ ਉਸ ਵੇਲੇ ਬਣੀ ਜਦੋਂ ਉਹ 12ਵੀਂ ਜਮਾਤ (ਮੈਡੀਕਲ) ਵਿੱਚ ਪੜ੍ਹਦੀ ਸੀ ਅਤੇ ਉਸ ਦੇ ਸਕੂਲ ਵਿੱਚ ਇੱਕ ਪੀਸੀਐਸ ਅਧਿਕਾਰੀ ਮੁੱਖ ਮਹਿਮਾਨ ਵਜੋਂ ਪਹੁੰਚੇ ਸਨ। ਉਸ ਅਧਿਕਾਰੀ ਦੇ ਪ੍ਰਭਾਵਸ਼ਾਲੀ ਵਿਅਕਤੀਤਵ ਅਤੇ ਸਮਾਜ ਸੇਵਾ ਦੀ ਭਾਵਨਾ ਨੇ ਸਿਮਰਨਦੀਪ ਦੇ ਮਨ 'ਤੇ ਅਜਿਹੀ ਡੂੰਘੀ ਛਾਪ ਛੱਡੀ ਕਿ ਉਸੇ ਦਿਨ ਉਸ ਨੇ ਅਧਿਕਾਰੀ ਬਣਨ ਦਾ ਧਾਰ ਲਿਆ ਸੀ। ਸਕੂਲੀ ਪੜ੍ਹਾਈ ਤੋਂ ਬਾਅਦ ਉਸ ਨੇ ਖਾਲਸਾ ਕਾਲਜ ਪਟਿਆਲਾ ਤੋਂ ਰਾਜਨੀਤੀ ਸ਼ਾਸਤਰ ਵਿੱਚ ਪੋਸਟ ਗ੍ਰੈਜੂਏਟ ਡਿਗਰੀ ਹਾਸਲ ਕੀਤੀ ਅਤੇ ਯੂਪੀਐਸਸੀ ਦੀ ਪ੍ਰੀਖਿਆ ਵਿੱਚ ਰਾਜਨੀਤੀ ਵਿਗਿਆਨ ਅਤੇ ਅੰਤਰਰਾਸ਼ਟਰੀ ਸਬੰਧ ਨੂੰ ਆਪਣਾ ਵਿਕਲਪਿਕ ਵਿਸ਼ਾ ਚੁਣਿਆ।ਇੱਕ ਸਾਧਾਰਨ ਪਰਿਵਾਰ ਨਾਲ ਸਬੰਧਤ ਹੋਣ ਕਰਕੇ ਸਿਮਰਨਦੀਪ ਦੇ ਪਿਤਾ ਕੁਲਦੀਪ ਸਿੰਘ ਖੇਤੀਬਾੜੀ ਕਰਦੇ ਹਨ ਅਤੇ ਮਾਂ ਅਮਨਦੀਪ ਕੌਰ ਘਰੇਲੂ ਔਰਤ ਹਨ। ਆਰਥਿਕ ਤੰਗੀਆਂ ਦੇ ਬਾਵਜੂਦ ਮਾਪਿਆਂ ਨੇ ਕਦੇ ਵੀ ਆਪਣੀ ਧੀ ਦੀ ਪੜ੍ਹਾਈ ਦੇ ਰਾਹ ਵਿੱਚ ਕੋਈ ਰੁਕਾਵਟ ਨਹੀਂ ਆਉਣ ਦਿੱਤੀ। ਲੱਖਾਂ ਰੁਪਏ ਦੀ ਮਹਿੰਗੀ ਕੋਚਿੰਗ ਦੇ ਖ਼ਰਚੇ ਤੋਂ ਬਚਣ ਲਈ ਸਿਮਰਨਦੀਪ ਨੇ ਬਿਨਾਂ ਕਿਸੇ ਰੈਗੂਲਰ ਕਲਾਸਰੂਮ ਕੋਚਿੰਗ ਦੇ, ਘਰ ਬੈਠ ਕੇ ਹੀ ਰੋਜ਼ਾਨਾ 8 ਤੋਂ 10 ਘੰਟੇ ਸੈਲਫ-ਸਟੱਡੀ ਕੀਤੀ। ਇਸ ਦੌਰਾਨ ਸਾਲ 2022 ਵਿੱਚ 'ਸੰਕਲਪ ਸੰਸਥਾ' ਉਸ ਦਾ ਵੱਡਾ ਸਹਾਰਾ ਬਣੀ, ਜਿਸ ਨੇ ਉਸ ਨੂੰ ਮੁਫ਼ਤ ਕੋਚਿੰਗ ਅਤੇ ਸਹੀ ਮਾਰਗਦਰਸ਼ਨ ਮੁਹੱਈਆ ਕਰਵਾਇਆ। ਸਿਮਰਨਦੀਪ ਮੁਤਾਬਕ ਪੜ੍ਹਾਈ ਦੇ ਘੰਟਿਆਂ ਨਾਲੋਂ ਨਿਰੰਤਰਤਾ, ਸੀਮਤ ਸਰੋਤ ਅਤੇ ਵਾਰ-ਵਾਰ ਕੀਤੀ ਦੁਹਰਾਈ ਸਭ ਤੋਂ ਵੱਧ ਮਹੱਤਵਪੂਰਨ ਹੁੰਦੀ ਹੈ।