ਜੇ ਦਫਨਾਉਣਾ .
ਦਫਨਾਓ ਜੇ ਦਫਨਾਉਣਾ ਹੈ
ਮੋਏ ਜ਼ਮੀਰਾਂ ਵਾਲਿਆਂ ਨੂੰ
ਕੀ ਖਾਸ ਗੱਲ ਹੈ ਦਫਨ ਕਰਨਾ
ਮੋਏ ਸ਼ਰੀਰਾਂ ਵਾਲਿਆਂ ਨੂੰ
ਇਨਸਾਨੀਅਤ ਜਦ ਧਾਹ ਮਾਰੇ
ਇਨਸਾਫ ਦਾ ਗਲ ਘੁੱਟ ਹੋਵੇ
ਜ਼ਰੂਰੀ ਹੋ ਜਾਏ ਤਲਾਸ਼ ਕਰਨਾ
ਹੱਕ ਸੱਚ ਦੇ ਰਖਵਾਲਿਆਂ ਨੂੰ
ਅਸੀਂ ਖੂਨ ਪੀਣ ਦੇਈਏ ਕਿਓਂ
ਇਹਨਾਂ ਖੂਨ ਪਾਣੀਆਂ ਜੋਕਾਂ ਨੂੰ
ਜ਼ਰੂਰੀ ਜਜ਼ਬਿਆਂ ਨੂੰ ਜੋਸ਼ ਦੇਣਾ
ਤੋੜਨਾ ਜ਼ੁਬਾਨ ਦੇ ਤਾਲਿਆਂ ਨੂੰ
ਕੋਈ ਸੋਧੇ ਇਹਨਾਂ ਕਾਫ਼ਰਾਂ ਨੂੰ
ਅੰਜਾਮ ਤੱਕ ਪਹੁੰਚਾਵੇ ਕੋਈ
ਮਜਲੂਮਾਂ ਦੇ ਲਹੂ ਨਾਲ ਸਿੰਜੀਆਂ
ਤਿੱਖੀਆਂ ਸ਼ਮਸ਼ੀਰਾਂ ਵਾਲਿਆਂ ਨੂੰ
ਕੋਈ ਤਾਂ ਮੁਰਦਾ ਸਾਬਿਤ ਕਰੇ
ਝੂਠੀਆਂ ਤਕਰੀਰਾਂ ਵਾਲਿਆਂ ਨੂੰ
ਦਫਨਾਓ ਜੇ ਦਫਨਾਉਣਾ ਹੈ
ਇਹਨਾਂ ਮੋਏ ਜ਼ਮੀਰਾਂ ਵਾਲਿਆਂ ਨੂੰ
- ਗੁਰਵੀਰ ਸਿਆਣ