ਇਹ ਕਵਿਤਾਵਾਂ-ਗ਼ਜ਼ਲਾਂ.
ਇਹ ਕਵਿਤਾਵਾਂ-ਗਜ਼ਲਾਂ ਮਜ਼ਾਰਾਂ ਨੇ
ਬਣੀਆਂ ਸੈਂਕੜੇ, ਲੱਖਾਂ, ਹਜ਼ਾਰਾਂ ਨੇ
ਇਹਨਾਂ ਵਿੱਚ ਅਹਿਸਾਸ ਦਫ਼ਨ ਨੇ
ਹਰਫਾਂ ਦੇ ਪਹਿਨਾਏ ਕਫ਼ਨ ਨੇ
ਇਹ ਜੀਵਿਤ ਹੁੰਦੀਆਂ ਦੁਬਾਰਾ ਨੇ
ਇਹ ਕਵਿਤਾਵਾਂ-ਗਜ਼ਲਾਂ ਮਜ਼ਾਰਾਂ ਨੇ
ਇਹਨਾਂ ਮਜ਼ਾਰਾਂ ਤੇ ਮੇਲੇ ਲੱਗਦੇ ਨੇ
ਜੀਹਨੂੰ ਮਹਿਫਲ ਕਹਿ ਕੇ ਸੱਦਦੇ ਨੇ
ਜਿਸ 'ਚ ਰੂਹਾਂ ਦੇ ਅਲਗੋਜ਼ੇ ਵੱਜਦੇ ਨੇ
ਖੁਸ਼ੀਆਂ-ਦਰਦਾਂ ਦੀਆਂ ਫੁਹਾਰਾਂ ਨੇ
ਇਹ ਕਵਿਤਾਵਾਂ-ਗਜ਼ਲਾਂ ਮਜ਼ਾਰਾਂ ਨੇ
ਕੁੱਝ ਦਫਨ ਹੋਏ ਵਿੱਚ ਖੇੜੇ ਦੇ
ਕਈ ਦਰਦਾਂ ਵਿਚਲੇ ਵਿਹੜੇ ਦੇ
ਕੁੱਝ ਮਗਰੋਂ ਦਿਲ ਨੂੰ ਛੇੜੇ ਤੇ
ਕਈ ਜਿੱਤਾਂ ਤੇ ਕਈ ਹਾਰਾਂ ਨੇ
ਇਹ ਕਵਿਤਾਵਾਂ-ਗਜ਼ਲਾਂ ਮਜ਼ਾਰਾਂ ਨੇ
ਇਹ ਮਜ਼ਾਰਾਂ, ਵਿੱਚ ਕਿਤਾਬਾਂ ਦੇ
ਸ਼ਿੰਗਾਰੀਆਂ ਨਾਲ ਅਲਫਾਜ਼ਾਂ ਦੇ
ਇਹ ਦਿੰਦੀਆਂ ਜਦੋਂ ਆਵਾਜ਼ਾਂ ਨੇ
ਫਿਰ ਬੰਨ੍ਹਦੀਆਂ ਖੂਬ ਨਜ਼ਾਰਾ ਨੇ
ਇਹ ਕਵਿਤਾਵਾਂ-ਗਜ਼ਲਾਂ ਮਜ਼ਾਰਾਂ ਨੇ
- - ਗੁਰਵੀਰ ਸਿਆਣ - -